Rawngbawlnaa thawhhona

“Keini zawng Pathian hnathawhpuitute kan ni si a” (I Kor. 3:9)

Mihring pianpui rilru chuan mahni tana thawh a duh thin. Mizo Pipute pawhin ‘Mahni tana Chakai khawrh’ tiin an sawi thin. Mahni thawhchhuah mahni tana neih rilru hi mihring rilru a ni. “Keimah” tih leh “Keima tan” tih hi mihring rilru lian a ni. Naupang tak ngial pawh hian ‘Keimah’ tih leh “Keima tan” tih hi an sawi dan a ni fo mai. Naupang awmkhawm zingah, heihi tu ta nge? ti ila, ‘Keima ta’ anti theuh mai ang. Heihi tu nge duh ti ta ila, ‘Keimah’ an ti leh theuh mai ang. ‘Keimah’ tih hi mihring rilru ah a lian a ni. A bikin Mizo rilru ah hian thawhho aiin mahni tana thawh duhna, mahni hmasialna hi a lian zual ti ila, a dik hle lo maw?

Kan thupui “ THAWHHO’  thu lo ngaihtuah tawh ila, Thawhho hi Pathian thawh dan a
ni. Pathian hnathawh kan hmuh hmasak ber chu, “Lei leh van leh a chhunga awmte
siam” a ni. Genesis bu bung khatah kan hmu. A thilsiam zinga ropui ber chu Mihring
a ni. Pathianin thil siam hna chu a thawk zel a, a mihring siamte pawh a thawhpui zel a. Chutianga Pathian hnathawh dan chu Bible-ah hmun tam takah kan hmu a ni. Nehemia chuan Jerusalem kulh chhiat thu a hriatin pawi tiin, a rilru a khawih hle a. Jerusalemah a kal a, kulh chim leh a kawngkhar kangte chu a en a. Juda te, puithiamte, mi thate, roreltute leh mi dang hnathawktu turte hnenah “ Jerusalem kulh chu i din leh ang u,” tiin a sawm a. Anni chuan, “ I tho ang u khai, I din teh tak
ang u,” an ti a. Chutichuan, chu hna tha thawk tur chuan ( Pathianin) an kut a tichak ta a. Jerusalem kulh chhia hi Nehemian amahin a din tha leh mai lova, mipuite thawhpui turin a sawm a, an thawk ho va, an din tha leh ta a ni.

Lal Isua leh a zirtirte pawh Pathian ram Chanchin Tha hrilin an thawkho a ni. Lal Isua chu Pathian Fapa, engkim tithei a ni a, a duh chuan amah chauh pawhin hna a thawk thei a ni. Mahse, a thawhpui atan zirtirte a ko va. Hna thawk turin a buatsaih a. He khawvela a tisa put laiin zirtirte nen an thawk ho va. A zirtirten chanchintha hril a, khaw hrang hranga an kalin, an zinga tel lo midang ramhuai hnawtchhuak an hmu a. Zirtirte zinga pakhat Johana chuan Lal Isua hnenah , “ Zirtirtu, mi tu emaw I hminga ramhuaite hnawtchhuak kan hmu a,nangmah kan zuinaah a tel ve loh avangin, kan khap ta asin,” tiin an hrilh a.A ni chuan, “Khap tawh suh u, tupawh mi dodal lo chu ka lama tang a ni,” tiin a hrilh a.Keimahni chauh hi thawktua inngai a, midangte hnawl mai awl tak a ni.Keimah nilo, mi dang, tam tak Pathian tana thawk an awm tih hriat fo a pawimawh. Kristian hmasate zingah rawngbawltu pawimawh tak tak an awm a ni.

Kohhrante leh Kristian pawl hrang hrangte pawh hian mahnia thawh leh mahni puala thawhna kan nei theuh hlawm a, Mahni kohhran leh mahni pawlin kan thawh tur, midangte nena thawhho remlo pawh a awm thei. Chutiang rawngbawlna chu keimahniin, keimahni pualin kan thawk zel ang. Rawngbawlna thenkhat chu mahnia thawk lova, midangte nena thawhho remchang zawk leh thawh that theih zawk pawh a tam ang. Chung rawngbawlnaah chuan thawhho kan hreh tur a ni lo va, phur taka thawhho kan tum zawk tur a ni. Tunlai khawvelah hian sawrkar te, sumdawngtute leh Kohhran leh Kristian pawl hrang hrangte hian tun hma lama mahnia thawh leh mahni puala thawhna neih an chin ang khan an ching ta lo hle. THAWHHO pawimawhzia leh tangkaizia an hria a ni. Mahnia kan thawh theih loh chu, midangte nen thawkhovin kan thawk thei a, kan thawk hlawk zawk bawk a ni.
Tanrual hi chakna a ni kan ti thin ang hian THAWHHO hi chakna a ni tih hi hre tharin, kan thawhpui theih apiangte nen thawhho I tum zel ang u.
THAWHHONAAH chuan mahni hmasialna a bo va, tanrualna te, inpumkhatna te leh
inunauna te a awm thin. Mahni tana thawh te, mahni pawl tana thawh te ngai pawimawh ber lovin PATHIAN nen PATHIAN tan I thawkho zel ang u.