Tan i la ang u!

-->

“Ngaihven ula, fimkhur rawh u; in khingpui Diabola chu sakeibaknei rum thin angin a ei theih tur zawngin a phi ruai thin;  in unau khawvela awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u.” I Petera 5:8-9

Thangkhat lian pawh a liam hma em a, “Hmanlai chuan maw’m!!!…..” tiha bul tana khumlaizawla thawnthu inhrilh thinna a reh chhoh mekna khawvela cheng mek, ringtu tha tak nia inhria leh titi hona vela ‘Kraws ram reh nun’ chilthli per thawt thawt khawpa sawi thei, mahse mahni/chhungkaw tana hlawkna tur nia hriat kawngah chuan  midang chhiatna tur pawh ngaihtuah duh silo tamna a cheng mek hringfa te hian kan nun hi kan chhut chiang ngai em?

Khawvel zirnaa a History tak leh kan Bible atang te leh keini tawn hriat ve  atang ngei pawh hian kan khawvel changkan chakzia kan hre thei awm e. Kan khawsak dan leh mizia la changkang tawklo hle mahse keini Mizo te ngei pawh hnam naupangte, kan chanchin ngei pawh kum za(100) liamta bak chiang taka sawi tur nei miahlo te pawhin khawvel changkanna thil in a ken tel te kan kawtkai leh inchhungah te kan hungin, kan dah ta far hlawm a nih hi. A. D 2000 bawr vel te kha chuan naupang chu sawi loh thingtlang nula leh tlangval tan pawn Telephone a mi han biakte pawh khan engemaw riau hi a awm thin a, kum upa lam ngaihtuahna hmang tam vaklo te phei chuan phone an han hman ve pawhin an duh duhna laiah an lo dah khup vei rawl bawk. Kum sawm hnih em pawh a la liam lo, kan nau leh fate ho erawh chuan Mobile Phone hmet ru niap niap pahin an zirlai an zir chho mek ta si.

Text Message (SMS), Phone call etc. heng zawng zawng lah hi a thlawn a hman theih a ni si lo. Top Up thun lah hian Mobile network Company te hian an tana hlawk tur chi an la hre thei em em leh nghal. A hmangtu te tana hman man mân deuh nih hmel tak hian ‘Óffer’ hrang hrang an han siam zui. Ni pawimawh engemaw bik, Message inthawn tam duh hun bik laiah te hian kan SMS Pack te lah hi hman theih lohvin min siam sak leh ringawt zel. Heng zawng zawng hi sumdawnna atana tu-pa thluak vawrhvirna a ni tih hre reng chung hian kan hmang lo thei si lo. Kan tana tangkai em em si, sum leh pai lam hek sak lutuk nia hriat si loh hian kan sum hi min eisak char char zel zawng a nih hi.

Internet kan ti a, hei lah hi hman thiam chuan kan hriatna tizau a, kan zirna kawnga min puitu tangkai em em nisi ; mahse tleirawl te, nula leh tlangval ten an nun kawnga harsatna thlentu pakhat, an nih tur ang leh nih phak ang pawh nih theih lohna hmanrua atan an hmang thung si. Tunlai Company ho reng reng hian sum peipun dan an zawng char char a, chu mi atan chuan kan tleirawl leh thalai te lawm tur zawng tak an ngaihtuah chhuak thiam em em bawk si. Heng hian Zoram tleirawlte leh thalaite nun zawimuangin a ei chhe mek a, langsar taka kan hriat theih hauh si loha sual tih chakna thinlung put theihna leh Kristian nun nghet kan neih theih miahlohna hnar chu heng changkanna thil te hi an ni tlat. Setana hian hengte hi hmanrua ah ala hmang thiam em em zui si. Nu leh pa te tan pawn kan fate khawlai leng loa TV hmaa an thut leh Phone a Games khel niawm taka an awm kan hmuh hi chuan ngaih tih that chu a awl ngawt ang. Thil sual ni anga lang miah silo thil leh pawi niawmin a lang reng reng lo. Mahse, khang thil khan zawimuangin kan fate nun a eichhe mek a ni si. An thil hmuh leh an thil hriat khan Pathian thu ngaihsaklohna lamah a hruai lut hneh nasa em em a ni. Lan dana tha fu, tih tur chanvo tha taka hlen zel chung si khan i fapa/fanu khan hmangaiha min tlantu Lal Isua aiin khawvel thil a lo ngai pawimawh hlauh a nge. Kan fate hian heng hmanrua te hi a tangkai tawktea an hman thiam theih nan nu leh pate hian kan zirtir a, kan hrilh hriat tam a tul a ni. A nih loh vek pawhin an puala kan tawngtai tam a ngai a ni. Khawvel sualna sang mek zelah hian sual hneh thei ngei turin chhungtin ten tan I la thar zel ang u.